Asai Mula Guha Tujôh

Ilustrasi lé Mikmilia

Lam hikayat jameun geucalitra, na tujôh droe aneuk muda nyang rayeuk that heut geuh meungjak ék aji u tanôh suci Mekkah. Ban tujôh muda seudang nyoe teungôh geupiké kiban cara geujak u Arab padahai meupèng sitali hana lam reugam. Geuikhtiyeu kaleuh meumacam bagoe mangat glah keu ungkoh kapai u tanôh suci nyan. Cit ka éh nan kada nibak Potallah, hana raseuki geuh lom. Teuma heut jak pubuet rukôn aji cukôp that raya sampoe hana pat peutheun lé.

“Meuhan meunoe mantong rakan jeut,” kheun sidroe aneuk muda lam kawan nyan geubi pikéran.

“Tapeurap lé geutanyoe keudéh u pasi, teuntèe na ulèe-ili kapai bôt jak u luwa. Teuma taseutôp ta lakée ikôt, peu-peu nyang mungkén laju takeurija. Meugantoe-gantoe kapai nyang ta ék, asai jitarék geutanyoe u Arabia,”peuneugah aneuk muda nyan ngon bahsa pantôn meuirama. Ban nam rakan nyang laén teuseungap teuhah babah.

“Pakon han kapeugah yôh awai dilèe, teuntèe ka jameun geutanyoe trôh u rumôh Allah,” seuôt sidroe aneuk muda lam kawan nyan ngon seunang haté geuh. Mandum awak nyoe kasapeu pakat ngon akai nyang jibi lé aneuk muda nyan. Teuntèe awak nyoe payah jipeusiap droe ngon makanan seureuta peu-peu mantong nyang peureulée bak jalan, kareuna gampông awak nyan ngon banda jeu’ôh that. Habeh lhèe uroe lhèe malam meunyo geujak ngon tapak.

Singoh jih ban tujôh aneuk muda nyan geubeurangkat laju ngon rayeuk seumangat. Muka geuh reumèh bah pih uroe seuuem lagoina. Rayeuk that hajad bagah meurapat bak mieng kuala. Jeut geu’ék kapai sampoe trôh ban cita. Meunan keuh haba, beungôh meugantoe keu singôh, singôh meugantoe keu lusa, malam meugantoe uroe, meunan keuh meugisa-gisa teutapi aneuk muda nyoe hana trôh-trôh u banda. Bèk an riyeuk meuputa-gisa, meusu manusia hana jideungô su lom. Awak nyan mantong lam uteun raya. Deuk ngon grah hana ngon peusa.

“Pakon hana trôh lom geutanyoe nyoe? Peu keuh mungkén geutanyoe ka sisat?” kheun sidroe aneuk muda nyang ka sakét sijuek seu’uem seureuta la’éh kareuna hèk deuk ngon grah lam perjalanan panyang nyan.

“Buleun di langét ka tujôh go teuka, tapi geutanyoe hana trôh lom. Jéh peunajôh cit ka habéh, kiban cara ta beurangkat lom. Lôn pih ka la’éh that, gaki kuh sakét peudeh leupah na. Badan kuh sijuek meutat-tat jilakèe istirahat,” kheun rakan nyang sakét nyan ngon leumôh asoe geuh.

“Meunoe mantong,” seu’ôt sidroe rakan nyang geuangkèe seubagoe keutua ureung nyan tujôh.

“Bah kamoe nyang trôn meumita gampông, meulakèe tulông soe-soe nyang na. Adak jibi bu meusaboh pingan, nyang peunteng rakan bagah teuga,” peuneugah Keutua nyan geubri usolan.

“Jeut cit meunyo meunan, neutinggai ulôn sidroe inoe, ureung dron neujak laju keudéh. Tiep-tiep useuha teuntée na meuhase geubri lé Po teuh.”

Aneuk muda ban nam nyoe sigra jijak mita tulông, jitrôn jimita pat mantong na gampong. Kareung ngon batèe tajam meugareuh gaki hana lé geurasa. Ban jikalon sidéh jeu’ôh na teuka asap, seunang haté that laju geupeurap keunan geupeutoe. Ladém na asap biasa jih na rumoh. Teuntèe jeut jilakèe tulông keu rakan nyang sakét di công glé jéh.

Oh ka sép hèk geuuseuha, teuma trôh keuh ban nam aneuk muda nyoe bak saboh gampông. Gampông nyan ceudah, gléh seureuta ureung nyang tari-tari ula-ili bak jalan raya. Seunalén bajèe ureung inong meublèt-blèt, meutamah lom ngon ruman candén, babah geuh teukhém-khém seunang leupah na. Bak takue meusawak manèk meuh nyang raya-raya ubé boh lakom, meunan cit jaroe peunoh ngon gleung meuh seureuta euncien nyang dhiet-dhiet wareuna. Meunan cit pinyueng seureuta gaki, bandum meutabu ngon héasan meuh kunéng nyang simban raya.

“Ci ta cuba tanyong bak sidroe ureung inong nyang jak-meujak nyan, pat jeut ta lakèe makanan keu ngon geutanyoe nyang sakét di công glé jéh,” tunyok Keutua bak sidroe ureung inong nyang hana jeu’oh bak awak nyan. Rakan-rakan nyang la’én laju geupeurap, geutawôk ureung inông nyan.

“E hai cut da, neudong siat kamoe keuneuk jak tanyong…” Haba Keutua nyoe payah geukoh kareuna ureung inông nyan langsông geusambôt ngon mirah hu muka geuh.

“Peubuet keunoe hai aneuk muda hai, ruman teuh kuto badan teuh khôh, bajee teuh brôk, hi teuh that gura. Keudeh ka jak laju beujeu’oh, keunoe bèk ka peutoe meubèk ka gisa. Di kamoe nyoe meung jak khanduri bak rumôh ureung kaya. Meunyoe meunoe peukateun di gata, luwat dum ureung han leupah bu jih. Ka deungo lôn, bagah ka minah hai aneuk agam kuto!” marit ureung inông nyan ngon babah meutarék u ateuh meutamah lom krôt muka seubagoe peulahe glak lam haté jih.


(Seunambông calitra nyoe sigo aleuhad teuk ka seuleusoe, teugoh geusalén lé nyang po kalam postingan nyoe)

Baca Juga:

• Siti Geulima dan Legenda Dua Paya di Padang Tiji 
• Cerita Legendaris Pencuri Tujuh, Tercuri Part 1 
• Cerita Legendaris Pencuri Tujuh, Tercuri (TAMAT)
• Viral dan Misterius! Di Sinilah Kampung Kuno Suku Mante (Ada Videonya)